ಈಗಷ್ಟೇ ಬೆಳ್ದಿಂಗಳು ಕಾಣೆಯಾದ ಈ ಹೊತ್ತು
ಕಡುಕಪ್ಪಿನಾಗಸದ ಅಡಿ ಹಾದುಬರುವೊಂದು
ಗಾಳಿಯಲೆಯ ದಿಕ್ಕು ನಿನ್ನಲ್ಲಿಂದ ಈ ಕಡೆಗಿದ್ದಿರಬಹುದು.
ತೀವ್ರವಾಗಿ ನನಗನಿಸುವುದು,
ಅದು ನಿನ್ನ ನಿಶ್ವಾಸದೊಂದು ತುಣುಕು ಹೊತ್ತಿರಬಹುದು.
ತುಣುಕಲಿ ನಿನ್ನ ನೆನೆಕೆಯ ಮೆಲುಘಮವಿರಬಹುದು.
ಆ ಘಮ ಉಚ್ಛ್ವಾಸವಾಗಿ ನನ್ನೊಳಗಿಳಿಯಬಹುದು.
ಸ್ವಸ್ಥಾನ ಸೇರಿದೊಂದು ನಿಟ್ಟುಸಿರಲ್ಲಾಗ ಹುಟ್ಟಬಹುದು!
ತುಳುಕುವಂತೆ ಕಾಣುವ ಕೆಲವು ಇಂಥ ಖಾಲಿಗಳಿಗೆಗಳಲ್ಲಿ
ಸುಮ್ಮಸುಮ್ಮನೆ ಹೀಗೂ ಅನಿಸುವುದು,
ಕೂತಲ್ಲೇ ನೀನೀಗ ಸುಮ್ಮನೆ ನನ್ನ ಹೆಸರ ಬರೆದಳಿಸುತಿರಬಹುದು.