ಸುರಿಯಲಾಗದ ದುಗುಡ
ಕದಡಿ ಬಾನಿನೆದೆ
ಹರಡಿದೆ ಅಷ್ಟಗಲ ಕಾರ್ಮೋಡ!

"ಹೋ.. ಬರಡಲ್ಲ ಬಾನು!"
ಸುಳ್ಳೊಂದು ಈ ನಲಿವಿಗೆ
ಪಾಪ ಗರಿಬಿಚ್ಚಿದೆ ನವಿಲು!

"ಉಸಿರಾಡದಿರು, ಸದ್ದಾದೀತು.."
ಅದೆಷ್ಟು ಸರಳ ಹೇಳಿಬಿಟ್ಟೆ!

ಕಾಣದೊಂದು ಕಾವಿಗೆ ರೆಕ್ಕೆ
ಸುಟ್ಟುಕೊಂಡ ಹಕ್ಕಿ ನಾನು;
ಪಂಜರದ ಬಾಗಿಲದೆಷ್ಟು
ಸಲೀಸು ತೆರೆದಿಟ್ಟುಬಿಟ್ಟೆ!

ಗೊತ್ತು, ಪ್ರೀತಿಯೆಂದರೆ,
ಬೀಸುಗಾಳಿಯಲೆ ತಂದ
ಗರಿ ಸವರಿದೊಂದು ಕ್ಷಣದ
ನವಿರು ಸ್ಪರ್ಶ ನಿನಗೆ!
ಹೊನ್ನೆಣ್ಣೆ ದೀಪದ ಕಾಡಿಗೆಯಲಿ
ಬೇಲಿಮುಳ್ಳು ಬರೆದ
ನಿನ್ನ ಹೆಸರ ಹಚ್ಚೆ ನನಗೆ!